喺年廿九，車路士同曼聯喺英超尾場握手言和，打和1:1；其中曼聯中場桑馬達賽後專登留喺球場，同咁多位前車路士隊友逐一握手，認真和氣生財；不過，有口痕友就話馬達可能知道佢嘅天敵摩連奴就快教紅魔，要為自己嘅未來鋪路。而不獲車路士續約嘅隊長泰利，亦可能因為隊友葛特蘇馬重創，令續約有轉機。
馬達攬舊隊友「鋪後路」
禮拜日車路士迎戰曼聯呢場英超大戰，之前已經表明未獲車路士續約嘅隊長泰利，上半場本來有先開紀錄嘅機會，佢嘅射門俾禁區內嘅曼聯後衞戴利白蘭特用手臂擋中，但球證竟然毫無表示，結果兩隊半場打和0:0。易邊後，曼聯喺61分鐘由連格打破缺口，領先1:0；不過，曼聯喺87分鐘換入翼鋒迪比後冇耐，到補時三分鐘就俾車路士嘅迪亞高哥斯達追和1:1；而一向冇觀眾緣嘅迪比，仲被指係紅魔今場失分罪人，話佢入場後浪費機會，踢嚟冇自信兼唔協助防守喎！
喺比賽結束後，曼聯中場馬達就專登留喺球場，同前車路士隊友逐一握手兼攬頭攬頸。唔好話我求大俠以小人之心度君子之腹，馬達咁做表面上好似有情有義，但須知道一向同佢唔妥、當年教車路士嗰陣仲逼到馬達走人嘅摩連奴，盛傳下季會教紅魔；咁馬達為咗前途，梗係要盡量同前隊友搞好關係啦！
蘇馬重創泰利或續約
賽事嘅另一個焦點，就係車路士中堅葛特蘇馬喺比賽期間膝部重創，應該有排唞，所以之前話唔獲球會續約嘅泰利，睇嚟有望留隊。不過泰利就話：「情況完全冇改變，我已經講過自己想留隊，但球會同我喺呢個moment完全冇偈傾！」同樣好火嘅仲有曼聯領隊雲高爾，佢賽後例牌又俾記者問到前途問題，佢就話：「你哋冇求證就去寫新聞，我夠可以話你聽日就俾人炒！」初三赤口都未到，已經同記者開年！
