今季意甲踢下踢下，睇嚟冠軍之爭只係剩番拿玻里同祖雲達斯（圖）之爭。兩隊喺周日聯賽都贏得辛苦。拿玻里主場迎戰卡比，靠希古恩喺69分鐘打破僵局贏1:0，24戰得56分繼續排榜首；祖記同日作客另一支升班馬費辛隆尼，又係要到比賽末段先出現入球，古達度先開紀錄加上保羅戴巴拿補時建功贏2:0，24戰得54分緊隨其後。拿玻里繼續領先兩分，但同第三位嘅費倫天拿已經拉開到10分，佢哋喺禮拜六將作客出戰祖雲達斯，上演榜首大戰。