廣州恒大喺上周六同港超南華發生衝突，雖然網民反應激烈，但事情總算冇進一步鬧大。恒大踢完熱身賽，會畀球員小休過年，但佢哋都預先拍定啲片同球迷賀年（圖）。恒大今日會出發去阿聯酋繼續進行季前備戰，到時身價達4,200萬歐元嘅前鋒積臣馬天尼斯（J馬）會喺杜拜同球隊會合。據西班牙《阿斯報》披露，馬天尼斯加盟恒大年薪有1,250萬歐元，計番一個鐘就有1,400歐元（約1.2萬港元）。