【本報訊】中環堅尼地道中國外交部駐香港特派員公署，昨大除夕早上發生恐襲驚魂！一輛載客的士疑跣胎失控打白鴿轉，直撞向公署大閘隆然巨響，惟公署屬敏感地帶嚴陣以待，警方接報如臨大敵派員到場調查，恐防有人利用車禍趁機偷襲公署；證實純屬交通意外。肇事司機揸了40年的士首遇「大場面」，儼如有恐怖分子來襲。
昨晨約9時，67歲姓李司機駕駛一輛載客的士，沿中環麥當勞道左轉落堅尼地道往金鐘行駛，李司機報稱因路面有餿水致跣胎失控，打白鴿轉後直撞向公署的一道大閘，保安員立即報警。
司機：真係大劑
車禍中，李及乘客並無受傷，事後乘客受驚，因趕上班先行離開，李則留下協助警方調查，他坦言知道上址為敏感機關，無奈謂：「我知，真係大劑！」又指事後公署「如臨大敵，好似擔心俾恐怖分子衝擊」；警方也大為緊張，先後有逾10名警員到場，「一單輕微交通意外，嚟一個（職級）大個一個，有三粒花（總督察），冇法啦」。李大嘆倒楣，暫未知賠償金額，但已付車行的按金肯定「凍過水」，惟有今日大年初一繼續開工，多賺些錢補償。
家住堅尼地大廈的黎小姐稱，意外後有4、5名職員走出查看，另有10多名警員到場，較長毛於六四抬棺材時還要墟冚，「梗係啦，點都要睇吓有冇政治因素」。
■記者胡恩宏
