今日大年初一，《蘋果》娛樂版找來十二生肖女郎一連三日到賀！事業、愛情走勢強勁的猴女蘇麗珊率先與讀者拜年，蘇麗珊本命年犯太歲代表多變動，她今年憑《哪一天我們會飛》角逐香港金像獎「最佳新演員」，往後日子希望全情投入電影工作，她說：「嚟緊參加金像獎，最想係拍好多好睇嘅電影，同夢想嘅導演合作。仲有會學車、學鋼琴、學泰拳同瑜伽，都希望可以一一實現。」
周嘉儀幸福增磅
年初完成了10年馬拉松夢、肖雞的劉心悠猴年運程非凡，不單紅鸞星動有望締結良緣，正、橫財都很好。已經榮升CEO不想再被稱為BB的心悠笑說：「𠵱家未有對象，緣份要嚟就嚟，或者都會閃婚，閃即係估唔到囉。所以覺得健康緊要啲。」
屬狗的前新聞之花周嘉儀，去年離開大台後到證券公司擔任董事，感情也有着落，與經民聯立法會議員林健鋒的34歲公子林凱章拍拖，未知是否太開心，嘉儀笑言增磅不少：「聖誕後好多應酬飯局，真係肥咗好多，要節制吓飲食，同埋要做運動keep。」
已為人妻的陳爽屬豬，前年一索得男誕囝囝Adrian，問她會否追生猴B？她笑言：「如果係都幾好，猴同豬都夾㗎，不過一切隨緣啦。」陳爽今年情人節會在加拿大工作中度過，她說：「本來想同老公去杜拜旅行，𠵱家要睇吓啲期，去得成會帶埋囝囝，讀萬卷書不如行萬里路。」
蘇麗珊 靈【猴】獻瑞
【財運】正財就無乜大起跌，反而橫財唔錯，投資可能有意外之財
【感情】舊年紅鸞桃花，今年仲有可能結婚，因為猴年犯太歲，有喜事沖喜會減輕負面情緒
【健康】因為犯太歲要小心易有損傷，尤其農曆七月，最好去外遊散心
【事業】只要肯努力，會不斷有貴人扶持，不過就要小心有小人
記者：楊潔雯
攝影：林德雄
服裝及形象設計：FAME GLORY
化妝：Leo Tam@Annie G.Chan
髮型：Nat Chan
劉心悠 金【雞】報喜
【財運】正財橫財都好好，仲有中獎機會，但係要小心左手來右手去
【感情】今年會同異性特別投緣，若然感情成熟嘅仲有望拉埋天窗
【健康】可能都有啲小病痛，但整體都唔係太大問題，定期檢查有備無患
【事業】權力地位名氣提升年，打工仔可以努力爭取升職
記者：何永寧
攝影：陳志嵐
場地提供：鐵板燒海賀（The ONE）
周嘉儀 長長【狗】久
【財運】投機太重嘅事最好唔好掂，今年有好大機會破財
【感情】算係較為平淡一年，不過平凡是福，一切隨遇而安亦無不可
【健康】仍然要小心飲食，要多爭取時間休息
【事業】發展較為反覆，多奔波勞碌，仲有唔少是非，最緊要唔好太執着，小心處理人際關係
記者：羅慧敏
攝影：林德雄
陳爽 如【豬】如寶
【財運】正財唔錯，投資會獲利，但小心橫財就唔太適宜
【感情】有異性緣，感情生活可以多姿多采，有機會搵到合適伴侶
【健康】最緊要小心保重，有小病痛
【事業】過完夏天就會有唔錯嘅事業發展，甚至會有升職加薪機會
記者：小米
攝影：陳順禎
場地提供：Habitat
