今季勇士注定要挑戰各項最強紀錄，上周六NBA常規賽，勇士喺主場迎戰雷霆，雖然主將史堤芬居里（Stephen Curry）三分波失靈，但都仍然以116:108贏波，以九連勝將戰績改寫成46勝4負，追平76人喺1966/67球季嘅開季50場最佳戰績紀錄。另外勇士已經跨季主場41連勝，亦向另一個紀錄逼近。
平開季50場最佳紀錄
今場波絕對係球迷翹首以待嘅得分大戰，三分王居里對得分王杜蘭特（Kevin Durant，KD），仲有三雙王祖蒙特格連（Draymond Green）同韋斯卜克（Russell Westbrook）較量。勇士半場以73:59領先雷霆，亦係今季第九次喺半場攻入至少70分，其餘29支球隊冇一隊多過一次。雷霆靠KD攻入全場最高嘅40分，喺完場前三分幾鐘追成104分平手。居里全場入26分但三分波只係九射一中，不過完場前射入三球加上兩次助攻奠勝。居里賽後話：「今場波氣氛就好似季後賽咁，令我打得更加起勁。」
再贏一場後，勇士追平咗76人喺1966/67球季所創嘅紀錄。不過球迷最關心始終係勇士可唔可以打破到1995/96球季公牛王朝72勝10負嘅歷來常規賽最佳成績，但勇士只要再連贏三場主場，就會追平公牛主場44連勝嘅NBA紀錄。