「紅軍」利物浦球迷一向以忠心熱情見稱，賽前晏菲路球場大合唱「You'll never walk alone」都好經典；但幾忠心都好，眼見球隊年年加票價都好難頂，上周六英超聯賽主場對新特蘭，就發起抗議行動，由於球隊將下季門票最高票價加到77英鎊（約870港元），所以就發起77分鐘離場抗議行動。英國傳媒估計，呢場四萬幾人入場嘅比賽，足足有過萬球迷提早走人，連名宿加歷查都參與埋一份，紅軍都要小心處理，唔好成為「關公」災難。
話時話，提早走嘅球迷都認真走得合時，因為睇唔到球隊失分一刻。利物浦領隊高路普雖因盲腸炎手術缺陣，都仲靠羅拔圖法明奴及拉爾拉拿各建一功領先2:0，但抗議行動開始後形勢逆轉，82分鐘客軍中場阿當莊臣射入罰球，加上89分鐘迪科爾轉身快射建功，逼和2:2，搞到紅軍近六場聯賽只贏得一場。
