雷神墮馬受傷自動停賽，巴西幫贏馬重任落喺蘇兆輝身上，呢位旺氣同身手兼備的猛將，這天跑到第四場三班1600米又入凱旋門，佢新接手葉楚航麾下的「小米周」（英文名Lucky Girl），順利幫呢匹熱門後上補中，單Win及組合獨贏A1，分別派47及16元正。
「小米周」乃四歲澳洲自購馬，上次由巫斯義跑1400米追唔切得第三，呢鋪加程初跑1600米，蘇兆輝初騎，人馬合作拉士如入無人之境，此駒灑開大步越衝越行，輕易將放到返嚟腳軟的對手追過，大勝3個半身位，表現相當吸睛，而騎練上次日賽以「實業風采」首度並肩作戰只跑第六，相隔六日後即以「小米周」再攻堅，歷來合作首勝，蘇兆輝亦告連續第六次賽事贏馬。
比較唔好彩的是何廐「領驫」，雷神養傷換上梁家俊仍被捧成全場最熱門，一生初跑三班撞正「小米周」呢匹超班惡爺，留前鬥後只得第二，暫時未能拎到首勝三班的60萬元本地拍賣馬特別獎金。
今場三、四名分別係冷門「贏男」同有飛馬「智者」，四重彩派9,402元。