【本報訊】中國人過節講意頭，團年飯餸菜亦各有名堂，例如「發財好事」、「橫財就手」，一聽就知食乜餸，食魚取其年年有餘、食蝦意為哈哈笑。正如老人家所言，食飯一定要有隻雞，除了取其諧音「有雞有計」，亦因「雞」與「家」同音，所以一定要食全隻雞，象徵「全家福」。所以每年過節，街市都會人頭湧湧，即使雞價和海鮮價今年略加一至兩成，亦無損市民購買意欲。
港人一向愛食活雞，而近年本地培植的雞種因為健康安全，大受巿民歡迎。其中本地嘉美雞，來自活健禽畜發展有限公司，其董事郭銘祥指出，每年一到做冬至農曆新年，活雞需求會大增，「一隻雞要養90至100日，所以接住兩個大節，需求好緊張」。
食肆連雞販，由平日一萬隻雞，急增逾倍至三萬隻，「成個農曆年間就要推10幾萬隻活雞應市，由年廿四開始增加，去到年廿八仲會好緊張」。據郭銘祥所知，不少熟客早向雞販預留活雞，「擔心政府即日鮮政策會買唔到雞過年」。而他的農場培植的嘉美雞、康保雞及皇健雞亦早預算好供應，價格預計會略增一成。
街市雞販的活雞價，由二月初慢慢調升，一月底約70元一斤，升至近日的75元一斤，農曆新年前夕會訂價90至95元一斤；另外海鮮價亦輕微上漲，九龍城街市新榮海鮮檔冼老闆指，海蝦價格一直都係維持在160元左右一斤，但如果係上等的中蝦要180元一斤；到年廿七至年初三，升到240至280元一斤；呢個價格其實同去年差不多。不過，如果覺得貴，100多元一斤的基圍蝦亦是不錯的選擇。
講到魚，港人最愛食斑，當中以東星斑最受歡迎。現時東星斑是340元一斤，過年期間可能增至400元一斤，一條斤多重的東星斑，就要600多元了。其實食海鮮豐儉由人，100多元一條的小龍躉亦甚受普羅大眾歡迎。
新鮮游水鮑魚也是近年團年飯或開年飯常見的餸菜，價錢較實惠的大連鮑，新年期間也只是200元斤；如果想吃豪一點，兩頭的南非鮑就要320元斤了。而價格較平穩的潮州大紅蟹，新年期間估計要500元斤，與平時480元一斤相差無幾。