【本報訊】 團年飯又叫年夜飯，在年三十晚大除夕一家人吃頓飯，簡單來講就是一年最後的晚餐。中國傳統上，無論身在外地工作，或在外遊學，都會趕回老家團年，喻意一家人團團圓圓。
《蘋果》一連五集，不但請來老字號恒豐行海味店第二代負責人Macy下廚，教大家簡單輕鬆地，為家人煮出6個海味賀年菜；介紹團年飯、開年飯和做禡的典故；看看團年飯街巿行情、酒樓訂枱情況；更會教大家點揀一隻靚雞過年。
今集先由Macy教大家煮新派賀年菜。一般家庭煮賀年菜，離不開蠔豉，取其諧音「好巿、好事」，第一道菜就教「香煎金蠔」，「一隻蠔可以送一碗飯」，不出10分鐘就可以煮成；而第二道「絲絲如意」則是小孩至愛，Macy指出海參營養高低脂肪，有益健康，但黑色一大條不為小朋友接受，「會覺得好核突」，但只要將海參、花膠、鮑魚切絲或切片來炒，加上醬汁，包保小朋友搶住食。最後一道是寒凍必食的「臘味糯米飯」，只要識得一個小竅門，就可以煮出大廚般的美味。
雖然Macy教煮三道菜，但一般團年飯或開年飯，最少要有六道菜，「一定係擺到成枱都係，寓意豐足，好講意頭，如果家庭成員多啲，甚至要煮到十二道菜。」Macy笑言不用擔心，煮完上述三道菜，只要加上蒸雞、蒸魚、煲湯，再炒菜，已可輕易煮到「六餸一湯」，一家人豐足團年，新手煮婦記住要好好收藏食譜了！
第一道菜：香煎金蠔
做法：
1) 先將金蠔解凍，洗淨後抹乾。
2) 用小火煎金蠔至兩邊金黃，再於蠔面落糖，再放薑、蒜粒輕炒，最後灒酒和豉油兜勻上菜。
**小貼士：煮起後宜即食，因放涼後金蠔會較硬身，影響口感。
第二道菜：絲絲如意
做法：
1) 將已浸發的海參和花膠，用高湯蒸煮40分鐘，高湯要保留，海參和花膠與罐頭鮑魚、木耳齊齊切絲或切片。
2) 起鑊將薑片、乾蔥爆香，放入柱侯醬、蠔油、麻油、豉油（或可轉加韓式辣醬，醬汁因應個人口味調製），再放入蒸煮海參和花膠的高湯。
3) 滾起再拌入海參、花膠、木耳，最後放入鮑魚兜炒至收水即可。
**小貼士：罐頭鮑魚略炒即可，另可以肉絲取代鮑魚絲
第三道菜：臘味糯米飯
做法：
1) 糯米浸2小時後，隔水蒸40分鐘，蒸至20分鐘時加入臘腸、膶腸同蒸。
2) 燒熱油，爆香乾蔥，再落蝦米、冬菇粒同炒，灒酒後放臘腸片兜勻。
3) 加入糯米飯炒至鬆散，然後放生抽、老抽、蠔油、麻酒、雞湯等調味料，最後加入膶腸略炒上碟。