猴年就到，係時候請球壇先知為大家算一算今年球壇風水運程，信則有，唔信就算。
1.香港終於有球員捧世界盃，包括花式足球冠軍，同打《FIFA》嘅冠軍。
2.巴西舉行嘅奧運足球賽由非洲球隊勝出，美國舉行嘅美洲國家盃由南美洲球隊勝出，法國舉行嘅歐洲國家盃由歐洲球隊勝出。
3.拜仁慕尼黑早三個月贏聯賽冠軍，球會取消慶祝活動。
4.香港多咗電視台播波，出現一班新一代嘅講波佬，仲有講波女。
5.有講波佬扮唔小心又爆出「金猴事件」，但球迷已經聽厭，結果冇人理。
6.有位前世界足球先生加盟中超，不過賣廣告多過落場。
7.有外國人去中國朝聖，發現上海迪士尼大把位，中超就反而入唔到場。
8.有中超球隊打破世界轉會費紀錄，羅致咗一位冇乜人識嘅球員，但同時有中超球員被拖糧。
9.香港隊再上A1頭條，成功團結黃絲藍絲，一日咁多。
10.白禮達全年冇影。
11.摩連奴加盟曼聯，同哥迪奧拿又打對台，並改稱自己做"only one"，仲斟C朗回巢。
12.曼城話即將簽到美斯，但傳足一年都未成事。
13.全球五歲小朋友紛紛自製膠袋波衫（圖），博免費換取美斯簽名嘅巴塞波衫一套。
14.伊巴謙莫域入波後太囂張，被對手襲擊，結果對手反而被佢個鼻撞暈。
15.李斯特城以史上最低分捧走英超冠軍。
16.朗尼終於被減人工，但仍然夠錢織髮。
17.施丹派大仔為皇馬上陣，而碧咸就派大仔賣內褲廣告。
18.加利仔冇波教返去講波，講得仲好過以前。
19.一年之後，大家對足球嘅興趣同知識又上一層樓；與此同時，大家估波嘅成功率仍然咁低。
KEYMAN
節目主持