【奇聞】無理客人金句 廣告人設計海報還擊
如果問世上哪個行業收過最多的不合理要求？我敢投廣告一票，可能客人以為廣告人既然販賣創意為生，應該不論甚麼都可以想得出又做得到，結果甚麼乜噏得出。愛爾蘭兩個廣告人Mark Shanley和Paddy Treacy，為了揭示客人要求可以無稽到哪個地步，訪問了不少同行，搜集眾多真客人所說過的真實要求，再做成海報。旁人一看應該即刻笑出聲，廣告人看呢，都會笑嘅，不過可能會眼泛淚光諗起為無理客人加無理要求而通頂的日子，再嘆句「係呀，我啲時間就死咗喺呢啲人手上」。
資料來源：design you trust
記者：黃力
客說：「嗰三文治要好玩啲！？！」okay，原來你係用三文治嚟玩嘅。
客問：「你唔可以用Photoshop執咗佢咩」梗係可以啦，Photoshop萬能嘛。
客說：「佢做人婆婆，太老喇嘛！」問世間有冇青春嘅阿婆？
客云：「改咗最尾句對白佢啦，咁喺隔籬房又冇睇緊電視嗰啲人先聽得到喎。」原來改對白可以改埋物理定律，Copywriter萬歲萬歲萬萬歲。
客說：「我哋嘅目標觀眾呢，有男有女，零歲或以上都係。」啊，咁你講係全世界咪得囉。
客說：「簡約啲好呀，但吉位太多喎。」長知識了，原來學設計都學錯，冇乜吉位先叫簡約。
客曰：「我好喜歡隻色，不過你可唔可以改咗佢。」得梗得啦，你喜歡點就點啦。
客說：「執走BB隻耳仔佢呀！」原來我哋對人類嘅理解都錯了。
客曰：「啲雪睇落去可唔可以暖啲？」可以，暖到一百度啱唔啱？