又中超又江蘇蘇寧，如果又講佢哋用天價簽球星，真係讀者唔悶，我求大俠都悶；今日就講單有關蘇寧花生程度十足嘅新聞，蘇寧大軍正喺西班牙集訓，25歲後衞楊笑天夜晚竟然流連歡場，仲帶埋金髮美女返酒店共度春宵，最大鑊係同美女自拍後，半裸相仲要流出，連環自爆下，蘇寧唔罰佢都唔得啦。
召妓半裸照流出
上季中國足協盃冠軍江蘇舜天，獲得電器連鎖店蘇寧入主兼改名，準備今季大搞，挑戰恒大霸業，球隊都好有心，拉大隊到西班牙集訓，點知楊笑天唔生性搞出大頭佛。話說呢兩日網上流傳楊笑天嘅閃卡，其中一張係佢着住球隊外套，喺當地一間夜店飲酒，隔籬就坐住個金髮靚女。呢張都唔叫大鑊，最大鑊之後兩張笑天哥自拍，佢就赤裸上身，金髮靚女一張只戴bra，另一張就同佢一樣上身冇着衫，笑天哥召妓傳言就滿天飛。
網上流傳笑天哥應該係俾友人出賣，事關佢自拍完諗住傳俾相熟朋友分享吓，點知網名「edward9」嘅網民，就將閃卡擺喺中國各大討論區，仲留言：「球隊在西班牙拉練（集訓），你卻在西班牙嫖洋妞，還敢穿着球隊訓練服去嫖妓再發圖。」
嗱，笑天哥去西班牙「為國爭光」，站在西班牙法律上就冇咩問題，不過正所謂寧俾人知莫俾人見，玩女玩到通晒天，蘇寧同區死對頭，好似杭州綠城、上海申花球迷，自然瘋狂轉載同恥笑佢，球會唔做嘢都唔得。其實中超召妓醜聞時有發生，好似00年香港球迷都熟識嘅國內球員彭偉國，就聯同五名深圳平安隊友，賽後嫖妓俾教練發現，佢哋就面對罰錢同終止合約等不同處分，事後稱為「平安六君子」；笑天哥本身已經唔係球隊主力，上年踢足協盃領紅爭啲搞到球隊出局，今次發生咁大單嘢，球會仲未有正式處罰，但睇怕都冇得留隊。
泰斯拿加盟做新標王
爆發「關公災難」，蘇寧真係簽多幾多星都唔掂，雖然烏克蘭球會薩克達已證實將巴西翼鋒阿歷士泰斯拿售予蘇寧，轉會費高達5,000萬歐元（約4.35億港元），打破恒大星期三收購馬德里體育會前鋒積臣馬天尼斯嘅中超轉會費紀錄，但已經簽咗拉美利斯嘅蘇寧話唔夠喉，仲傳今夏以5,700萬鎊（約6.5億港元）收購車路士中場奧斯卡杜斯山度士，想組成巴西鐵三角，不過有好外援，都要執番好球員紀律先得。
