立法會負責處理《選舉管理委員會條例》下3項規例修訂嘅小組委員會，噚日首次開會選主席，唔知點解班泛民議員唔見人，由於只有建制派議員在席，結果建制派偷雞成功，全場玩晒。
代為主持會議嘅譚耀宗見開會時間一到，即話︰「夠人，選主席，有乜提議？」黨友葉國謙即提名譚耀宗做主席，多名建制派委員舉手和議，譚耀宗都嚇一跳︰「嘩，咁多人舉！」
譚耀宗差啲就諗住做主席主持會議，要葉國謙提醒︰「你問一句仲有冇人提名嘛。」譚耀宗先記得問。
譚耀宗再問使唔使選副主席，全場建制大嗌「唔使」，佢再問需唔需要邀公眾發表意見，建制再大嗌「唔需要」，全部兩分鐘內搞掂。
呢個時候民主黨主席劉慧卿、莫乃光先趕到，卿姐一臉驚訝：「咁快手？你兩分鐘做咁鬼多嘢？」譚耀宗笑住講︰「仲有好多好嘢。」全個會前後開咗約3分鐘就結束，「效率」高到呢！