每逢農曆新年，英美駐港總領事都會按傳統發表新年賀辭，繼前日英國駐港總領事吳若蘭以齊天大聖粵劇造型拍片拜年後，噚日輪到美國駐港總領事夏千福嘅「賀歲片」登場。千福BB以往嘅新年賀辭都十分搞鬼，今年佢再搞搞新意思，自己化身唐三藏，仲有觀音客串，向港人拜個早年。
呢條片長約4分鐘，故事一開始，有美領館職員提醒千福BB，又到時候拍「賀歲片」，千福BB度橋期間，身後觀音畫像忽然畀啟示佢，話佢之所以未完成使命，係因為未遇上三個徒弟，於是賜佢一面鏡，吩咐佢要隨心出發。
千福BB先搭船過大海去澳門醫肚，一入餐廳就遇見自稱「豬八戒」嘅大肥佬食葡撻，結果「豬八戒」做咗千福BB大弟子。之後千福又喺沙田車公廟外遇上「沙僧」同「孫悟空」，仲認叻話自己識得「車公廟」三字，又吸引咗二人「跟大佬」。最後四師徒齊齊返回領事館向同事及市民拜年，片尾千福BB被同事叫醒，先發覺原來發咗場好夢。