老將巫斯義自續約文家良馬房主帥後，成績不過不失，剛戰他策「鴻福滿滿」包尾不特止，仲因為跑過終點後對該駒不當用鞭，拍打座騎頭部附近，被罰款一萬五千元，荷包唔肉赤就假，加上日前策「恩格斯」爭大賽梗頸四兼不小心策騎，稍後要停賽三期。所以急於求補償損失的巫巫，本周六（6日）唔砌盡自己隻實力座騎「辣得很」就假咯！
講到「辣得很」，將角逐第十場二班1400米，馬主黃紋同老公吳創木，出名對馬房兄弟好好，繼早前「辣得醒」慶功宴，請晒霍利時上下開餐後，今個禮拜二晚，佢哋再包咗自己間餐廳，同文家良全倉團年，雖然巫斯義都有嚟，但就有得睇冇得食，今戰「辣得很」負122磅，巫巫一食多咗就可能體重飆升，費事超重騎唔到錯失機會，當晚他只係叫咗杯可樂，仲要就住飲，文家良大讚佢為咗贏馬夠晒專業，不過天寒地凍冇嘢落肚會影響健康，文家良苦口婆心，巫巫先食咗半碗仔食物。
睇番「辣得很」，1400米贏過兩場最首本，最近喺1400米落敗，純因遇上「天笑」、「澳斯卡」、有得威」等對手太強，今次對手分量減弱，真係咪睇小。