【本報訊】維園年宵踏入第4日，昨午後陽光普照驅散寒氣，不少市民趁機入場買年花，人流雖比之前幾日回升，但有濕貨檔主稱生意額至少下跌一成。另一邊廂乾貨檔卻大收旺場，尤以本土產品銷情最佳，「唔L係掛」樹熊及菠蘿包攬枕均熱賣過百個。
第3年在維園賣蝴蝶蘭的周小姐稱今年旺丁不旺財，「啲人好似過馬路咁，行過就算」，生意較去年少近三分之一。她指顧客講價很厲害，出手不如上年疏爽，期望周末人流增多可真正帶動生意額增長。
何小姐第2年與朋友合資賣年花，認為年宵首兩日多雲有雨，天氣寒冷令人流減少，幸好昨日有陽光人流即回升，「但係問價就多，買就少」，生意額下跌一成，「希望過兩日會多人啲」。賣水仙江先生亦指人流比去年少約一成，生意額亦相應下跌一成，但近日有陽光利水仙生長，展望其後數天生意有所改善。
一巷之隔的乾貨檔人流亦絡繹不絕。馬先生及盧先生今年根據網絡人氣圖片「唔X係掛樹熊」造成實物公仔，又將驚訝表情放在猴年主角馬騮身上，製成枕頭，分別售150元及100元，每款已各賣出過百隻。他們稱香港接連發生荒謬事件，如李波失蹤、高鐵超支等，認為熱賣全因港人有共鳴。
大學生賣冰室攬枕保文化
浸大一班同學以倒閉冰室為賣點，掛上白底紅字橫額，售賣代表香港地道飲食文化的菠蘿油攬枕，每個128元，已賣出近200個。
一年級同學李小姐表示，近年地產霸權橫行，不少小店因加租而倒閉，希望提醒港人珍惜身邊獨有的本地文化。
■記者佘錦洪