被私有化嘅「宅男女神」陳瀅，自從同男友賭王四房長子何猷亨大方承認戀情之後，陳瀅坦言拍拖以來，都未餓過，未餓過原因係兩人有共同嗜好就係「為食」，從美食中培養感情。
男友家境身份敏感，陳瀅承認會令大家有種錯覺，女仔識有家底男仔就係拜金，相反識窮男仔就係倒貼，佢覺得點樣都會被亂寫，自己好難去改變呢個情況，唯有係靠自己，用時間證明呢段情係雙方都有努力經營，並非兒戲。
兩個人看似毫無關係，究竟點樣認識，陳瀅指同猷亨喺大學同學互相認識，只係當時彼此未有感覺，佢自言一向鍾意有上進心嘅男仔，讀書時無發現猷亨有呢個優點，反而出咗社會工作，先發現佢做人處事都好積極上進，被問到男友最吸引地方係乜，佢指可能大家眼中佢係何家公子，見到只係緋聞同奢華生活，而自己所認識就完全唔同，佢接觸再了解後，男友對工作認真勤奮，可能換轉其他家底富裕嘅二十多歲男仔，應該終日玩唔想返工，但男友係佢認識同年齡層男仔中最有熱誠。
拍拖以來都未餓過，陳瀅指男友非常配合自己要求男友為食條件，兩人拍拖時經常四出搵好嘢食，猷亨鍾意食之餘又唔浪費食物，仲有個優點係負責食清餸菜。男友亦會買好多嘢去佢屋企食，閒時唔出街就玩煮飯仔，好姊妹何雁詩係室友，陳瀅指不時兩對情侶四個人會一齊喺屋企食飯。
事無大小男友細心照顧，陳瀅指唯獨錢就唔駛男友照顧，佢透露自己家境都唔差，自細要乜有乜，讀書時都會追求物質同靚車，踏入社會打工後，就無再拎家人零用錢，每分每毫都係自己搵番嚟，仲要交租養車，所以o依家唔捨得亂洗錢。