今日已經農曆年廿七，港股做埋今日都收爐，但係證監會投資產品部執行董事梁鳳儀（Julia）就呻「忙到年廿九」。佢講吓笑啫，年廿九係星期日，邊使開工啊。不過佢話農曆新年冇打算去旅行。咁不如留港消費，同屋企人輕鬆吓，又或者好似佢辭任副局長時咁講，放假補眠喇。
唔經唔覺，今年3月2日Julia就做夠證監會1年。Julia之前做過5年財庫局副局長、14年金管局，離開財庫局好似過冷河，做過學術研究顧問，仲寫埋書做過作家，問佢滿意證監會呢個新崗位嗎？佢即刻好大反應咁話：「打工邊敢滿唔滿意啊？你知我做邊份工都咁開心，咁勤力㗎！」講完佢自己都識得笑：「係咪好行呢？哈哈，完全明白，因為我都做過記者。」
Julia本來就喺新聞系畢業，當過幾年《亞洲華爾街日報》記者，答呢啲問題果然識得避重就輕。