加利尼維利暫時睇嚟，真係一個教練界嘅笑話！佢教咗華倫西亞近兩個月，一場聯賽都未贏過，周三西班牙盃四強首回合，仲要喺魯營球場吞咗巴塞隆拿七隻光蛋。
堂堂傳統勁旅搞到如斯田地，加利佬𠵱家真係華倫之恥，由球迷到名宿都叫佢落台，但佢就堅拒辭職喎。
拒絕辭職勁厚顏
呢場西盃「蝙蝠兵團」作客巴塞，其實都冇人期望加利佬贏到，但點都估唔到輸得咁肉酸，美斯三球，蘇亞雷斯就四球，最終華倫以0:7慘敗，次回合基本上反勝無望，都可以話出硬局。加利佬賽後話，呢場係佢足球生涯其中一個最慘痛嘅時刻，有記者就問佢會唔會引咎辭職，佢只係答一個「no」字；面對兩次嘅追問，佢就好似人肉錄音機咁話：「下一條問題。」
一場大敗加一個厚顏嘅加利佬，引爆華倫球迷累積咗兩個月嘅怒火；佢哋唔單止喺網上鬧爆新帥，仲整個tag叫#Nevilleveteya，意思係「尼維利即刻同我扯」！加利佬上年12月中接手，帶咗15場比賽，只喺西盃贏過，聯賽八場都未開齋，連主場對希杭都輸得，真係唔怪得球迷咁嬲！
美斯戴帽 阿蘇大四喜
至於撐華倫嘅賭仔相信有一樣心情，因為加利佬上任後，球隊喺「讓球主客和」同「讓球」嘅盤路都係輸多贏少。華倫名宿簡尼沙利斯都忍唔住炮轟：「喺我認知入面，呢場係華倫最恥辱嘅敗仗！我期望加利佬可以辭職兼道歉，但出乎我意料之外，佢竟然冇咁做，我之前仲以為佢係個誠實嘅人。」我求大俠諗，加利佬教到華倫咁沉，第日被炒返去講波嗰陣，實被拍檔加歷查笑足成世。
呢場波嘅焦點人物仲有由皇家馬德里借去華倫嘅卓利舒夫，呢位「淘汰」皇馬嘅首席功臣，喺魯營嘅風頭拍得住美斯，當佢後備入替嗰陣，全場巴塞球迷為佢鼓掌吶喊。喺西盃32強，皇馬派咗原本要停賽嘅卓利舒夫上陣，結果皇馬被罰出局。另外，呢場最開心嘅當然係入三球同四球嘅美斯同阿蘇，好在比賽用嘅波一向唔止一個，所以佢兩個都可以各自帶個波返屋企留念，至於尼馬就斯人獨憔悴，射失12碼，MSN得佢冇波入。