Package男神劉鳴煒呢期曝光率好高，而身為海洋公園副主席嘅佢噚日都抽時間同傳媒團年，蜜運中嘅佢不知幾風騷（圖）。有傳媒問起海洋公園情人節有乜活動時，佢一啲都冇避忌講埋一份，八方打蛇隨棍上問佢情人節點過？佢大方話：「梗係喺屋企煮飯仔啦！我唔會喺呢啲日子中消費陷阱嘅，啲嘢咁貴，呃人咩！」咁又係，連爛西裝都補番照着，證明佢慳得就慳。咁煮飯仔由邊個負責煮？佢話「梗係我啦」，之後就起身鬆人，似乎怕八方繼續問落去。至於海洋公園情人節則有水族館露營活動，畀情侶喺館內搭帳篷露營，同啲魚魚一齊過。