猴子嘅特性係聰明又靈巧，八方數過，立法會原來都有三位肖猴嘅馬騮精，兩個泛民猴王係社民連梁國雄同公民黨陳家洛，有晒百厭兼精叻嘅特徵，勞工界潘兆平卻唔算太「猴」擒，喺議會經常乖乖坐定定。
建制馬騮精冇得偷「逃」
1956年出生嘅長毛，踏入60歲！八方問過長毛，佢話今年係佢本命年，可能再犯官非，「如果用迷信角度，我今年係冇運行」。至於有冇人話佢天性似甩繩馬騮？佢話：「睇你點睇，有啲人話似。」佢仲將毛澤東名句「金猴奮起千鈞棒，玉宇澄清萬里埃」送畀香港人，意思係將妖魔鬼怪打得落花流水，「希望香港人打爛晒啲唔合理嘅嘢」，呼籲市民支持民主派，集中票源打敗與港人為敵嘅梁振英。
勞工界潘兆平同樣1956年出世，佢同長毛好唔同，平時份人好文靜，唔似馬騮紮紮跳，相信身為建制派嘅佢，今年拉布戰下怕且唔可以猴子「偷逃」咯！八方問過佢嘅新年願望，佢話最緊要係所有人都身體健康，兼且打工仔有工開兼有人工加，經濟繼續繁榮穩定。
三猴中陳家洛最年輕，1968年出生嘅佢今年48歲。家洛話新年願望係：「靈猴大發神威，香港命運自主。」指自己屬猴又係雙子座：「我思故我在、愛靜卻好動、瞻前亦顧後、樂意合群但享受獨立。」直認有時真係有啲似甩繩馬騮：「人哋孫悟空三打白骨精，我就追打媚共大話精！」
李八方
mailto:[email protected]