【科健籽】室內鍊車　飄移過新年

【科健籽：好動之城】
多得一班熱情親戚，農曆新年成為不少人心目中最難過節日頭三位，他們是你父母外世上最關心你感情世界及薪金的人，而且世事總被他們看透，人生教練咁嘅樣。每次拜年都惶惶恐恐，不如暗中反擊，帶他們去「Crazy Cart」試車場來個乾坤大飄移再撞散佢哋……幻想吓都得啩？

每逢過農曆新年，大伯二叔三表姨四姑姐例必塞錢入你袋，先派利是做甜頭，然後FBI式盤問你感情及工作狀況，由於食鹽多過你食米，又會語重心長講千串道理。聽聽吓，你會發覺自己拳頭慢慢變硬，但礙於一場親戚無謂反面。幸好，反擊機會嚟啦，新正頭「Crazy Cart」照常營業（初一除外），不妨帶「好友」親朋去這試車場比賽，惡鬥時碰撞難免，條氣即時順番，爽過收利是。
Crazy Cart位於觀塘工廈，地方不算大，賽道約籃球場大小，以車胎砌出四個彎道。負責人葉文俊：「crazy cart是電動玩具車，主要玩飄移及攻彎，幾年前已在外國流行，我住美國的表弟、堂弟早已買來在花園玩。」由於容易做出飄移效果，加上車速不俗，反而吸引好多成人車迷。「五十多公斤普通人坐上去，細車最高時速約14公里，大車約24公里。」記者實試，用力踏油門頗有速度感，但玩了10分鐘仍未完全掌握飄移技巧，經常打白鴿轉。負責人指要玩得純熟，起碼要練習半小時，但跟好友齋鬥速度已很刺激，加上你撞我，我撞你，很興奮。

車版記者Steve（左）試玩：「雖則機械裝置有別，但飄移方式似真車，同時安全得多，玩幾個圈已經上手，飄移過彎好爽。」

斥資50萬　一手一腳裝修試車場

試車場五位主腦皆是愛車和《頭文字D》的九十後，有次在YouTube發現crazy cart可玩飄移過彎，幾個月前盡地一鋪，合資50萬從美國引入，不難想像過年親戚朋友問起，大概又會話佢哋：「唔捱得，唔夠腳踏實地。」之後再塞錢入佢哋袋詳述50萬投資策略。五個九十後其實好捱得，自行髹牆、砌磚、裝燈，花一個月將舊貨倉重新裝修成試車場，跟廢青扯不上關係。談到香港獨特的親戚關係及拜年谷氣事，他們好有共鳴，但就提醒大家別大力撞車，除了可能親友相殘，都要小心撞壞須破費賠償。