前政務司司長唐英年早前呼籲女性參選特首，外界覺得佢旨在睇葉劉淑儀大戰689。八方問過2012年特首選舉期間發動「ABC（Anyone But CY）」嘅自由黨田北俊（圖）點睇，佢都力撐女士參選：「叫唐太（郭妤淺）選啦，唐太選贏嘅機會大過唐生啊！」唐太社交手腕向來一流，政界亦讚佢處事待人好精靈，難怪獲田少點名出征，為唐營出氣上演復仇記！
田少同時話今年續捐錢撐民主黨黨慶，「既然劉慧卿都唔做（放棄連任）嘞，我梗係要恭喜吓佢」。佢仲自稱呷醋，皆因CY下令封殺自由黨黨慶，卻自動獻身話想去民主黨生日party，「不如民主黨做建制派，我哋自由黨做反對派啦。」更笑稱已同卿姐講明，若然CY出席，佢就唔去咯。