本周末(6日)日馬重頭戲1800米三級賽百週年紀念銀瓶，絕大部份配搭已定，好似莫雷拉策「喜蓮歡星」、莫雅初騎「多名利」、潘頓替「包裝鬥士」操刀等，而今季兩戰兩勝，蘇保羅馬房的全港最忠心馬匹「天笑」，已經卜定近期人氣急升之巴西籍英國冠軍騎師蘇兆輝執韁。
蘇保羅說：「『天笑』暑假期間一對膝部接受手術，前仗季內復出狀態未足，仍能跑贏『軍勇戰神』同『澳斯卡』等惡馬，已經令我好驚喜。上仗再出增程至1600米，對手一樣咁強，牠亦可建功，真是唔簡單。在我心目中『天笑』是匹不可多得的良駒，牠仍繼續進步中，初次挑戰級際賽，我對其機會抱樂觀態度。」
「天笑」16戰5冠4亞7季全上名，今季兩勝分別配潘頓及羅理雅，不過兩人今仗均冇份騎此駒。
至於2013年香港瓶冠軍「多名利」，去年曾遠征澳洲，出爭當地兩項賽事，今年大摩同樣有此打算。他表示：「『多名利』今季香港瓶步速較慢，不適合牠發揮。今次再與本地賽駒同場角逐，牠仍是很有潛質的馬，可望交出更佳表現。儘管『多名利』已報名角逐杜拜世界盃，但今年牠大概不會前赴當地參賽。反而，我認為馬兒前往悉尼出戰寶馬錦標的機會大一點。」