中國足協喺周三透過官網宣佈，任命50歲嘅高洪波接任國家隊主帥，領軍備戰喺下個月剩番兩場嘅世盃外亞洲區次圈賽事，喺24同29號先後主場迎戰馬爾代夫同卡塔爾，但之後就未必會留任嘞。
足協續搵人做長工
高洪波曾經喺2009年做過國足教練，到2011年被甘馬曹頂替。足協之前炒咗佩連，據講一共收到45位教練提出申請，但接納過專家意見同推薦之後，認為距離下輪世盃外開打時間唔多，決定聘用對國家隊相當熟路嘅高洪波再次擔任主帥。不過，足協喺聲明度亦提及，為咗中國足球嘅長遠發展，將會更加慎重咁繼續進行國足教練嘅選聘工作，換言之高洪波都未必做得長。高洪波喺上季去咗荷甲海牙做助教，雖然今次回歸國足只算係臨時，但都唔使咁灰嘅，如果三月份嗰兩場波踢得好，或者可以長期坐正呢。