雷神同韋達這晚分別於頭場及第三場遇意外，認真唔老利，反為田泰安當老肯，頭場贏完呂廐「公証揚聖」未夠喉，第三場四班1000米以蔡廐「紅衣醒神」再下一城，季內一下子彈上26Win，壓過郭能殺上騎師榜第四位，氣勢好盛！
初出馬「紅衣醒神」賽前試閘三次全勝，其中田草800米嗰次更加造出超快時間，備受各方注視，這晚初出即被捧成2.7倍大熱，結果早段齋跑最後100米，交出天馬行空式後勁，將原本走甩晒以為贏得的「威先生」追過，順利打響服役頭炮，蔡廐更連續贏到第三次賽事，並擴大領先優勢。
相反「先生」系卻唔好彩，繼剛周日「索先生」初出搏失做二奶後，這場「威先生」出擊功敗垂成，亦只能屈居亞軍，三、四名都係高手座騎，分別為莫雅「創意寶」及蘇兆輝「聖驛善」，四重彩派3,930元。3揀1（組合獨贏)A1派19.5元。
「紅衣醒神」馬主顧永祥父親顧嘉善表示，此馬由他的一位香港馬販朋友代為引入，在港三試大閘均勝出，做足備戰工夫，故此賽前有一定信心，他笑言「紅衣」系已有一段未交出頭馬，希望「紅衣醒神」能有繼續有好成績。