恒隆地產（101）上星期公佈舊年盈利跌逾五成，內地商場生意一般，股價因而食瀉藥，噚日收報13.4元，跌近2008年海嘯低位13.08元。但一班管理層未洩氣，近日北上為濟南恒隆廣場嘅同事打氣。
恒隆董事總經理陳南祿近日率領一班管理層，包括任職恒隆董事辦公室高級經理嘅太子爺陳文博飛上濟南，跟同事講解生意情況，其間跟內地同事一齊喺飯堂食飯，呢餐有菜有肉，但估唔到太子爺都係自己𢳂飯，陳啟宗的確教仔有方。
聽講，陳文博出差亦冇特別交通安排，都係跟住陳南祿等人趕飛機、趕高鐵，不過為分散風險，成班管理層係會分開不同班機飛嘅。佢哋跟住會飛去上海見同事，之後就回港收爐了。