前幾日先話「中國不存在爆煲論」，家陣又話「中國點止迷失廿年」，係咪轉軚先？梗係no啦，之前交代完好難爆煲，以下就交代未來中國可以有幾慘烈。
噚日講到，中國未來冇足夠現金流去同時滿足貪官、人民以至未來發展需要。如果反貪太勁，會招致利益團體強烈反對，後果係走資、政權動盪，呢個大家睇得好清楚；如果貪得太勁，又會令企業利潤率被壓榨，令企業冇多餘錢發展新業務、做科研、加人工等等。過度貪腐，已令大批國企長期沉淪喺還債、還息嘅無間地獄，失去翻身嘅能力，你諗住有新興企業可以跑出？大部份未游出公海就俾官員食吓夾棍，俾人抄晒啲idea，中途搞死咗，騰訊（700）、阿里呢啲當然係異數。喺一個貪腐、鍾意呃股東又唔重視知識產權嘅國家，以新興企業、新科技去推動經濟會困難重重。
困局或許係死症，但H指市賬率0.8倍已算半爆煲價，估值合理，但長遠嚟講，中國會走向邊條絕路？如果係日本迷失超過20年嘅劇本，已要開香檳。粗略用H指同日經平均指數比較，H指目前市賬率0.82倍，已低過日經指數過去30年嘅0.83倍低位。或許H指已反映到日本經濟最衰嘅時候，是否跌無可跌？又未必，因為相比貪腐同樣嚴重嘅俄羅斯，股票指數市賬率曾經跌到去0.6倍、0.4倍，係咪好慘烈呢？
晉佳
https://www.facebook.com/advanceguy1/