今日係年廿六，雖然羊年只剩今、明兩個交易日，但淡友似乎戰意未減。紐約期油連跌3日，隔晚再穿30美元，歐美股市大跌，避險情緒升溫，資金流向美債。港股在走資疑慮下，昨裂口低開535點，收18991，跌455點或2.3%，萬九關不保兼失守10日線。
上周四期指結算後，翌日港股大幅反彈，似係淡友為建淡倉挾高股市。踏入2月，本周已連跌3日，淡友昨大舉屠牛後仍有誘因再殺落。索羅斯、對沖基金海曼等大鱷又不斷放風沽空人民幣、港元等亞洲貨幣，中港股市難以安心過年。
年尾流流，送羊迎猴，廣東風俗過年前要買活魚、生菜等軋年，寓意年年有餘、來年生財。股民係唔使買股票軋年嘅，不過想講下意頭求個安心，揀藍籌股比較穩陣，選擇亦多，例如家宅祥和——長和（001）、丁財兩旺——旺旺（151）、出入平安——平保（2318）等。
金山軟件添增長動力
我揀股就講求實際，近日睇好科技股。據英國《金融時報》報道，由高盛前董事長Jim O'Neill於2001年提出的BRIC（金磚四國）——巴西、俄羅斯、印度、中國，雖然曾被視為全球經濟增長引擎，但隨着巴西、俄羅斯經濟深陷衰退，金磚神話破滅，取而代之係TICK——台灣、印度、中國、韓國，成為新興市場基金經理投資新寵。換言之，科技業為主的台灣、南韓取代了資源大國巴西、俄羅斯的位置。
科技股中，我的心水係金山軟件（3888），一來金山軟件10日線升穿20日線，出現黃金交叉；二來該股係春節受惠股。一年一度的春運已於1月24日開始，至3月3日，為期40日。春節係離鄉打工者回鄉團聚的大日子，預計春運期間全國旅客量超過29億人次。
據百度大數據，春運首日三大搜索關鍵詞依次為：火車票、12306（即鐵路客戶服務中心）、飛機票。金山軟件旗下獵豹安全瀏覽器可預訂車票，登錄12306後即協助設置搶票車次、自動刷票，搶票後更會發出付款提醒，被譽為「搶票神器」。隨着線上買票越來越普及，金山軟件再添增長動力。金山軟件昨收15.88元，上望17.5元。
CNBC交易員排名榜（不計已歿者），排名僅次於索羅斯的Paul Tudor Jones，其交易原則：不順時減倉，順利時加倉，永不在無法控制的情形下交易。與各戰友共勉之，祝猴年財源廣進！
割柑人
本欄逢周四刊出