亞視今年4月1日便停牌，即使有新股東司榮彬入主仍未能解決財困，部份員工遭拖欠去年12月和上月薪金，有指亞視內部「山窮水盡」，除清潔公司暫停服務，採訪車也沒錢入油，《亞洲早晨》及《十二點半新聞》前日起暫停播放。
07年亞姐冠軍張家瑩昨日約滿，她返公司收拾物品和請同事食「散水餅」，她直認公司不肯預支半年薪金作保障做續約條件，在亞視工作6年的她昨日跟同事道別時更淚盈於睫：「好心噏，噚晚心情好沉重，冇諗過咁樣走。」張家瑩又說：「12月糧出咗，但公司係要7日內出埋啲糧畀我。」她逗留兩個多小時後離開：「公司內部士氣有少少消沉，撞見有同事講遞咗辭職信，我行出咗亞視，發覺出面一片美好。」她稱獲數間經理人公司傾合作。
表面運作正常
亞視昨日表面如常運作，仍有安排往返大埔墟港鐵站的接駁巴士接載員工，而門外竟仍掛招募人材的宣傳板。昨日網上出現亞視今日結業惡搞改圖，亞視發言人黃守東回應：「呢啲係謠言，公司運作正常。」據知改圖去年曾出現。亞視高級副總裁劉瀾昌昨在商台承認部份員工被拖欠薪金，陸續有員工離開，亞視新聞部目前按牌照要求播放傍晚及晚間的新聞，人手上還可應付，但亞視有停播風險。
此外，離巢多年的尹天照支持亞視盡快「安樂死」，他昨在調景嶺說：「如果真係唔得，何必糾纏？不如執咗佢，放員工生路。」近日做了腦動脈瘤栓塞微創手術的林建明前晚在灣仔接受訪問時也寸亞視：「嗰啲沙沙滾、混吉嘅返去瞓啦，唔好累人累物。快啲執，開間新嘅。」
採訪：黃曉妍、陳杰
攝影：陳順禎