當西甲最廢教練遇上教練剋星，究竟會產生咩化學作用？加利尼維利都教咗華倫西亞個半月，一場聯賽都未贏過，佢被稱為球壇版趙括，即係「紙上談兵」，講波一流但教波九流。喺冬季轉會窗臨閂之前，佢突然喺皇家馬德里班咗個救兵，就係俄羅斯翼鋒卓利舒夫。呢個名，相信前皇馬教頭賓尼迪斯肯定記得！佢喺西盃將原本要停賽嘅卓利舒夫派上陣，搞到皇馬被罰出局，間接令肥賓下台！唔知卓利舒夫呢位教練剋星，會唔會同加利仔嚟個負負得正、幫華倫翻生呢？睇吓華倫周三喺西盃四強首回合作客巴塞隆拿踢成點先！