體壇拾趣：占士、路夫世紀合照賀殺「馬」

方丈都唔一定小器嘅！NBA「方丈」有好多，騎士嘅就一定係勒邦占士（LeBron James），之前炒教練布拉特（David Blatt），江湖傳聞大帝係始作俑者；而大帝另一個傳聞眼中釘就係前鋒路夫（Kevin Love），不過周一騎士作客以111:106加時險勝溜馬之後，占士心情大好，終於拉埋路夫一齊合照，唔通佢哋破冰？

占士同路夫私底下有冇合照過，呢個就無法查證，但占士喺個人ig度放有路夫嘅相就少之又少，三星期前大帝又上載張冇路夫嘅大合照，搞到路夫自己都酸溜溜，要好似毒男咁PS自己落去張大合照度，自嘲味濃。

新帥路爾有功勞

好彩換咗新帥路爾（Tyronn Lue）後，騎士戰績穩步上揚，周一作客溜馬激戰至加時以五分險勝；「三巨頭」都叫各有貢獻，占士就有24分12籃板，後衞K艾榮（Kyrie Irving）亦有25分七助攻，路夫都有19分。睇嚟大帝龍顏大悅，賽後喺更衣室大合照就拉埋路夫，而路夫自己都上載咗呢張世紀合照；有網民仲留言話：「k love made it ahaha（路夫做到了，哈哈哈）」。
其實占士同路夫改善關係似乎唔係僥倖，據ESPN透露，路爾上任後就拉埋「三巨頭」一齊開咗個閉門會議，大家三口六面講清楚有咩開心唔開心，據報佢哋各自認錯，仲達成咗一啲協議互相監督，比之前團結咗好多㖭。