位於維園對面嘅皇仁書院，今年繼續喺維園擺檔。噚日主打一眾皇仁幫撐場（圖），包括多位立法會議員梁繼昌、梁家騮、胡志偉，「雙梁」原來仲係1979年同屆畢業，同場仲有1966年畢業嘅前立法會秘書長馮載祥。
各人即場寫揮春，梁繼昌連揸毛筆嘅手勢都唔得掂，喺胡志偉寫「大吉」後，佢寫咗「大利」兩字，可能佢都係擅長揸鉛子筆寫英文多啲。馮載祥寫福字，最後眾師兄弟嚟個左膠大合唱唱校歌，開花炮預祝班師弟賺個夠。
梁家騮自爆生肖屬虎，名字中嘅騮字意思係馬，與馬騮無關。佢話當年讀預科首年成績由尾數上第二，最後一年先發力，之後入大學讀醫。