為咗練好馬術，「馬術公主」賴楨敏（Jacqueline）過去六年長住歐洲，噚日佢專程返港出席香港馬術大師賽記招，之後即晚飛返丹麥。Jacqueline將會同騎師梁家俊喺香港大師賽參加「香港賽馬會騎師馬術混合賽」。難得囡囡返港，靚媽吳夏萍噚日除咗拍低佢一舉一動外，仲大爆Jacqueline花名叫「賴初一」，點解？因為佢喺25年前嘅年初一出世囉。今月19至21號喺亞博舉行嘅大師賽，Jacqueline會喺15號生日當天返港備戰。