【拆局】
政府不惜繞過正常程序，突然決定將高鐵追加撥款交財委會審議。有立法會議員相信，高鐵工程涉及北京的政治任務，所以不惜代價也要令工程繼續；而直接交上財委會，就是要預留時間給泛民議員拉布，甚至有指所謂2月底是撥款審議「死線」，也非真正的死線，「呢一切只係鋪排，要將剪布變得合理，亦可以向市民解釋」。
該立法會議員表示，前特首曾蔭權當年堅持要興建高鐵，面對強大民意反對也企硬，事後曾有官員向他說，高鐵要直抵香港是政治任務，「北京要高鐵可以由中國最北，直達最南特區，呢個係主權問題、政治任務，特區冇權反對或異議」。
以此看今次特區政府繞過正常程序，將高鐵追加撥款交財委會審議，不難理解是另一場政治任務，「總之一定唔可以停工、一定要起，究竟一地兩檢係唔係有問題，港人擔唔擔心，根本唔會考慮」。
提早交財會鋪排剪布
至於要提早交財委會審議高鐵追加撥款，另一立法會議員稱，一切只是為日後剪布作鋪排，令剪布變得合理化，「𠵱家預16個鐘討論，咁就算剪布都叫有藉口，可以大大聲話畀足時間提問，等泛民冇得話政府匆匆通過」。
該立法會議員甚至聽聞，政府所謂2月底是撥款「死線」，其實也不是真正死線，「有傳話財會主席陳健波私下問建制議員，3月11日再加會得唔得，即係話2月過唔到都可以，所謂2月底死線，其實只係加大泛民壓力，為剪布搭台」。
■記者莫劍弦