周一被關於滙控（005）全球凍薪的即時新聞吵醒，心想之前不是指集團正考慮除高層外，其他員工最多加薪3%嗎？為甚麼一下子變了全部人凍薪？想了一會，因為太凍，決定睡個「回籠覺」，惟睡了約兩、三分鐘，電話響起，來自一投行高層。
投行高層說：「有冇睇到滙豐話全球凍薪？（有呀，啱啱睇到，仲瞓番㖭）睇咗仲瞓得番？（又凍又未夠鐘做嘢，當然瞓得番啦）有無搞錯呀！呢個全人類凍薪決定嘅訊息，真係好壞好壞㗎，等於係預告咗今年市道，無論香港以至全球，都應該堅唔得。」
投行高層「一輪嘴」說：「滙豐香港舊年12月先交咗個加薪計劃，已提議中高層凍薪，然後只係好卑微咁要求其他員工最多加薪3%，但結果係點？結果係滙豐極高層只係睇咗1月條數，就要急住宣佈全球大凍薪！你話1月條數幾咁唔得！」
全世界等食「西北風」？投行高層說：「或者可以研究吓，如何食西北風可以食飽啲。」人已醒。
後記：市況雖壞，好消息是這個多災多難的羊年將完結，在此與海迪預祝大家新一年開開心心，財運亨通，衷心希望猴年不用再寫太多壞消息。本篇是《樂香園》羊年「收爐作」，初八啓市。
密西比