「股壇長毛」David Webb未等到下星期初三赤口，噚日已經發炮鬧港交所（388）行政總裁李小加，話佢未吸取舊年推「同股不同權」失敗嘅經驗，上月宣佈新3年戰略計劃時，提出有意增設第三板，以容納新興科技或「同股不同權」公司！
Webb一向反對同股不同權，噚日佢撰文，語帶譏諷咁話上市委員會𠵱家好鍾意「創新」，之前建議同股不同權，𠵱家就諗住為third-class companies去設立第三板。
Webb認為，港交所應該將主板與創業板合併，兼且修改上市規定，以撥亂反正（近年好多人鬧上市公司質素下降），但係李小加偏偏想整多個板，畀一啲根本唔符合香港上市條件嘅公司來港上市，李小加似乎仲未學乖咁話。
Webb又舊事重提，指上市規則嘅監管工作應該由港交所交畀證監會。