佐敦一帶嘅酒店好多遊客都好鍾意住，貪佢交通方便夠晒就腳，但要喺競爭對手入面突出自己，除咗服務好之外都要花啲心思。費清近排送個外國朋友返酒店嘅時候，發現由大堂到客房有好多唔同嘅藝術作品，唔少仲一眼就得出係香港啲本土嘢，喂又話香港係文化沙漠嘅？
未入門口喺停車場已經有嘢睇，原來泊車嘅地方擺咗好多用木造長櫈，仲有一棵睇落好Raw嘅木頭樹模型。原來所有木材全部都係果欄爛咗唔要嘅木卡板，藝術家王天仁特登收集嚟整咗個迷你「榕樹頭」，等住客搶閘感受吓油尖旺區嘅社區氣息。
唔止出面有樹，喺Reception後面亦都畫咗一棵樹，仲係香港周街都會見到嘅細葉榕。藝術家鄭哈雷特登揀咗一棵種喺柯士甸路邊嘅細葉榕畫成牆畫，將條街同酒店融為一體。
酒店地庫係一間酒吧，但旁邊特別間出大片空間作為展覽廳，可以畀藝術家舉行唔同嘅展覽。
除咗公共空間，酒店房入面都有藝術品。現時酒店5樓同7樓都同藝術家合作，好似7樓嘅每間客房牆上都有一幅牆畫，由藝術家鄺萬春以一張台兩張櫈連繫香港唔同地方，好似百老匯電影中心茶座、美都茶餐廳咁。
5樓嘅房係非一般客房，叫做「Space Studio」，入面咩傢俬都冇，可以按租客嘅心意舉辦唔同嘅活動。每間房嘅天花就掛有藝術家阮家儀嘅裝置藝術「城市」，用當年撐起香港經濟嘅鐘錶、電子、塑膠等唔同產品或者組件砌成，就咁睇好似平平無奇，但如果一打燈，就會喺牆上投映出香港天際線。
呢間咁有文化氣息嘅酒店叫Hotel Stage，幾年前被收購改建，舊年年底先完成裝修，而家仲係試業階段。酒店總經理熊運恆同費清講，油尖旺區附近有好多本地歷史文化同故事，酒店叫做「Stage」係想成為一個平台，令遊客可以透過唔同藝術作品更深入認識香港。