政圈近期都吹起特首梁振英下屆一定獲阿爺支持連任風聲，皆因阿爺欣賞梁振英夠硬淨咁話喎！見識過阿爺點樣可以不遺餘力撐一個人嘅前政務司司長唐英年，𠵱家逍遙自在，點會仲攞苦嚟辛，噚日講明來屆拒絕再玩，仲話期望有女性參選。咁又係，如果仲有689做對手，抹黑戰都嚇到有氣冇碇唞，何妨腳印印做花生友，支持葉劉大戰689？
葉劉冇落閘：希望有競爭
唐唐噚日話呀，上屆選舉令家人好大壓力，當然唔會再出戰，又話睇到有更年輕同更有能力人士勝任特首呢個重要職位，希望呢啲有心人為香港出力，言下之意即係現任嗰位唔勝任箒！佢仲特別提及，過往3屆特首選舉都冇女候選人，期望今屆會突破，但拒絕透露心水名單，笑稱可能同記者想像嘅一樣喎。
嗱，坊間盛傳有意選特首嘅女性唔多喎，但唔少得新民黨主席葉劉淑儀呢位悍將！八方問過葉劉，會唔會響應唐唐呼召去馬先？葉劉拒評會否參選，但就話：「我希望特首選舉有競爭，不論男女，性別唔係一個問題……總之希望有競爭。」總之未落閘啦！
正所謂好男不與女鬥；如果唔係好男，咪即係會鬥一番，係咪好睇好多先？八方記得上屆特首選舉，葉劉中途爭入閘，拉票時爆咗句：「梁振英會害人，我唔會害人！」若然呢次佢又去馬，相信大家都期待佢再爆seed，為選戰增加娛樂性！
李八方
mailto:[email protected]