左丁山架老爺車在新年前大修，送咗去大偈強車房之後，每晚坐的士返屋企，點知又增加見聞。一上的士，左丁山就瞌眼瞓，過咗隧道之後抬頭一望，見到的士司機名牌寫住香××，姓香嘅司機，極少見，於是多口問句：「司機哥哥係唔係東莞人？」司機答：「唔係呀，我知姓香嘅多數係東莞橫瀝鎮一帶人士，但我地係廣州附近四會人士。」咁奇？廣州一帶有人姓香？未聽過噃。司機再解釋：「其實我老竇姓鄉下個鄉，不過佢六十年代逃亡偷渡嚟香港，去入境處攞身份證，入境處啲官員話鄉下佬講咩呀，邊度有人姓鄉㗎，你一定係姓香港嗰個香，於是佢從此由身份證決定了姓香，我地在港出生，出世紙也跟住姓香。老竇臨死前要我地在神主牌寫番佢姓鄉。」哦，原來係五十幾年前入境處職員唔識字，將佢一家由姓鄉變成姓香，唔怪得不是東莞人，情況就如澳洲移民局N年前胡亂替新入境華裔移民改變姓氏一樣。領展行政總裁王國龍嘅英文姓氏係Hongchoy，不是Wong，就係此類烏龍之作。
姓鄉比姓香仲少人姓。回家立即翻查，上網搵百家姓。原來春秋時期晉國有南鄉邑（今湖北均縣），居民以居邑名稱為姓氏，即以「南鄉」為姓，傳傳吓就簡化之為鄉姓，有後代移居廣東四會。而姓香呢，內地百家姓資料話全國有不足二萬人，祖宗係查銓錄，字錫玄，南宋末年大臣，與文天祥、陸秀夫等護送宋帝昺逃港。香氏人口分佈於東莞橫瀝、廣西合浦、內蒙古河套、甘肅民勤及香港等等地方。
第二晚又坐的士，因中環中心一帶架架的士都有客，不得已之下，行行重行行，行到信德中心地下搭過海車，司機聽緊「自由風」講李波事件，主持係新亞師弟馮德雄與客串評論員狄志遠。如常瞌眼瞓啦，點知司機一路炒蝦拆蟹鬧黎棟國冇膽，袁國強冇用，建制派冇腦只識做應聲蟲，乜咁大火氣呀？問一句就刺激咗司機滔滔不絕，令左丁山冇法子再閉目養神。司機之言，或可反映香港人心態，就係雖然明知阿爺大晒，可隨意來港拿人，破壞一國兩制，但唔該唔好當香港人係儍豬，用啲爛藉口去欺騙港人吖，司機最不滿所謂坐洗頭艇去叫雞，住在泰國住豪宅而忽然後悔回國投案呢兩種講法，完全違反常識。其他三個失蹤人士呢？又有甚麼叫雞、自首嘅藉口呀，或者係自行無證件返回大陸辦事呀？梁振英假如肯揸枝筆攞本拍紙簿去見吓的士司機大佬，施政或會順利啲。