周日意甲米蘭打吡，估唔到戰情咁一面倒，AC米蘭以3:0大勝國際米蘭。坐咗近半季榜首嘅國米繼續頹，已經連續四場聯賽贏唔到，教練文仙尼仲領紅被逐，兼隨時有手尾跟。
國米極刑宴客吞三蛋
A米由守將阿歷士洛里高先開紀錄領先半場，易邊後國米本來有扳平機會，可惜因為早前批評文仙尼被貶為後備嘅莫路伊卡迪，出嚟主射12碼宴客；到比賽末段，A米再連入兩球大勝。文仙尼喺下半場初段因為唔滿意球證冇吹12碼，怒罵第四裁判後領紅被逐，離場嗰陣仲向場邊A米球迷舉中指；佢賽後話俾球迷掟嘢先咁做，但亦有公開道歉。其實文仙尼都唔孤單嘅，費倫天拿主帥保羅蘇沙喺作客0:0悶和熱拿亞場波一樣領紅，不過佢就無辜少少，只係想快啲開波，但個波未出界就出腳踢。