城中名人商賈為其第二代鋪路天經地義，中原集團主席施永青亦為兒子接棒做預備功夫。中原旗下嘅利嘉閣，噚晚喺灣仔會展搞周年晚會，除咗大批女代理無懼寒流、照舊低胸短裙到場外，施永青亦帶埋佢位公子、前利嘉閣資訊科技發展總監施俊嶸（Alex）撐場。
身高6呎、整個package嚟講屬筍盤嘅Alex，早排已經返咗中原嘅資訊科技部門工作，噚晚到利嘉閣搞周年晚會經已係前職員身份，不過佢無接受傳媒訪問。
施永青就話個仔雖然係佢生，但接唔接棒畀個仔自己揀。不過Alex𠵱家肯返中原幫手，相信係有興趣接棒喇。施永青仲話，地產呢行有好多嘢要學，阿仔要逐步嚟。