今季荷甲本來有三大勁旅阿積士（紅白衫）、燕豪芬同飛燕諾鬥得燦爛，點知阿積士同飛燕諾新一年突然唔掂，益晒燕豪芬。阿積士周日聯賽作客洛達，領先兩球下竟然被逼和2:2，1.41倍嘅單W咁就冇咗，歇冬後得兩勝兩和，連個榜首位都俾燕豪芬攞埋；飛燕諾仲頹，同日主場淨吞海牙兩蛋，1.39倍主W化為烏有，歇冬後四連敗，已經俾燕豪芬甩開14分，仲搞到追佢哋反底嘅球迷輸到一頸血。如果飛燕諾再唔振作，相信教練雲邦賀斯好快會聞到魷魚香！