【本報訊】數日前確診急性肝衰竭，現時全身插滿喉管陷入昏迷的32歲地盤管工葉錫豪，現留醫瑪麗醫院深切治療部，急需O型肝臟移植續命。葉媽媽指自己最大心願是有好心人捐出屍肝，「兩仔乸一齊撐落去，等佢起番身叫我一聲媽咪」。
昏迷指數有改善
葉錫豪昨一度睜開眼睛，但不足一分鐘便閉上，陪伴葉媽媽的退休護士徐姑娘指錫豪的昏迷指數昨有少許改善，但葉媽媽的心依舊未能放下，「我唔敢講好定差，好驚情況又變壞」。希望二字成了支撐葉媽媽唯一動力，「日日嚟望下佢，希望佢唔好冧、我都唔好冧」。
葉媽媽指錫豪昨因失禁致衣物骯髒，故特意買成人紙尿褲以及按摩棒替錫豪按摩肌肉，「我同佢講撐住，兩仔乸一齊撐落去」。葉媽媽每天只有漫長的等待，起床吃過午飯就到醫院，下午1時第一輪探病過後便坐在醫院餐廳，等到晚上第二輪探病完結才回家。
農曆新年將至，葉媽媽指錫豪熱愛下廚，以往大時大節都會一手包辦晚飯，即使只有二人過節，錫豪仍毫不吝嗇買過百元星斑和煮其他佳餚，孝敬母親，「紅燒蝦碌，佢煮得好食過我」。可惜一場急病令葉媽媽失去方向，不敢奢求太多，只望有好心人捐出屍肝，「乜都唔諗啦，只係望佢快啲醒番叫我一聲媽咪」。
兩母子一直相依為命，葉媽媽現時回家只剩下一人面對四面牆，「好矛盾，喺屋企咩都做唔到，嚟醫院又驚聽到壞消息」。每日到醫院第一句就是問護士「好咗定差咗」。葉媽媽寢食不安，令她的朋友憂心不已，「佢哋叫我唔好唔食嘢，我每次淨係食少少，都唔知日子點過」。瑪麗醫院查詢電話2255 3838。
■記者趙雅婷