泰利季尾離開車路士，係一個時代嘅結束，亦係一代球迷緬懷青春嘅流逝。泰利、林柏特、杜奧巴同施治代表車路士嘅崛起，亦象徵英超「big 4」盛世，但都逃唔過時間洗禮。車路士四大長老當中，最根正苗「藍」嘅一位，亦係最後嘅一位，終於宣佈要離開史丹福橋。10年前那支鐵血藍戰士嘅痕迹，來季恐怕只剩下一個約翰米基爾。
「童話般結局唔會發生」
「上星期對阿仙奴前，我已知冇得續約，今年會係我最後一次踢英足盃，我希望有個美滿回憶。心理上，我已經接受呢個事實，大家都要繼續向前望。」車路士禮拜日喺英足盃第四圈，作客大勝英冠米爾頓凱恩斯5:1晉級，點知泰利賽後就宣佈呢個令車迷心碎嘅消息，「每年一月，我都會收到續約消息，但今年我冇收到；球會話新領隊到，可能有變。人生總有不如意事，我冇得喺車路士掛靴，童話般結局唔會發生。」車仔中堅葛特蘇馬就話好震驚，佢覺得泰利仲可以踢多幾年。
呢位鐵血隊長14歲加盟車仔，17歲首次為球隊披甲，至今征戰18個年頭。04/05球季，摩連奴上任主帥，泰利升任隊長，佢哋同林柏特、施治、杜奧巴攜手，喺英超以無敵姿態兩連霸，開創藍色時代。縱使摩帥兩上兩落、未竟全功；縱然泰利在莫斯科嘅雨夜中跣腳留憾，但四大長老喺2012年搏盡老命，終於為阿巴莫域治贏到夢寐以求嘅歐聯。
車仔死撐續約有轉機
三位同行戰友先後告別，呢次輪到35歲嘅泰利，佢話：「我冇辦法為其他英超球隊效命，我會離開英超。」而阿仙奴領隊雲格亦話唔會繼施治後，連泰利都簽埋。唔知佢季尾會唔會隨林柏特同杜奧巴嘅步伐去美職聯呢？車仔發言人就話續約仲有轉機，亦有指泰利咁做只係逼車仔續約，呢啲就要放長雙眼睇吓喇。車路士喺英足盃16強會主場硬撼曼城，阿仙奴迎戰侯城，曼聯就作客英甲梳士貝利。
