最近每次見到愛斯賓奴，基斯坦奴朗拿度（C朗、右）都好開心，因為佢又可以刷數據嘞！C朗喺禮拜日西甲轟入三球，幫皇家馬德里主場大勝愛奴6:0，C朗近三次對愛奴總共入咗11球咁多！施丹亦取得上任後第三場勝仗，喺佢帶隊下，皇馬喺巴拿比奴次次都大勝對手。另外講吓巴塞隆拿，前排有個着住膠袋美斯波衫嘅阿富汗小朋友紅爆網絡，連美斯都出聲尋人；阿富汗足總話，佢哋已經收到美斯同巴塞嘅電郵，安排緊五歲嘅艾馬迪去同偶像見面。