韓流天王鄭智薰（Rain）前晚在香港亞博開騷，不但吸引佘詩曼、羅霖和黃聖依等朝聖，完騷後Rain於凌晨時分到中環夜店Play出席after party，更吸引Ball后薛芷倫、周子揚、莊思敏和天堂鳥等到場欲一睹Rain風采。
薛芷倫因前晚出席癌症基金會周年慈善餐舞會而未能欣賞Rain個唱，遂於凌晨1時許以一身太后look趕到夜店，以為可以趁早到場等候向Rain集郵，可惜夜店保安較平日嚴謹，所有出入VIP區賓客均要出示手上VIP手帶，否則一槪被拒進入VIP區，就連Ball后薛芷倫也一樣冇面畀被黑人保安力阻進入，就算Play老闆之一的清洪契仔巫翊鳴出馬，保安亦一樣沒情講。巫翊鳴見薛芷倫大怒即上前安撫，但薛芷倫仍表現嬲怒，扯火跟身邊女友人說：「我唔玩嘞，我走。」結果未及等到Rain前來便離開。
群星赴夜店朝聖
Rain完騷後先拉隊到九龍塘消夜慶功，勁擦鵝肝、牛扒和龍蝦，花費近萬元一席。至凌晨2時許Rain現身夜店，莊思敏、莊思明、劉晨芝等即趁機上前合照。
至於何傲兒舊愛周子揚於凌晨2點40分到場，身邊還有位長髮熟女，二人頻咬耳仔狀甚投契，周子揚更不時笑笑口心情不俗。記者昨致電周子揚時，他否認熟女是新女友：「絕對唔係，我哋係成班做金融嘅同事一齊去，之前有嘢做去唔到睇騷，希望去after party沾啲風采，可惜VIP房裏面仲有VIP房，去到Rain好似已經走咗。」跟熟女可有發展機會？周子揚說：「將來緣份唔知道，但現階段我哋都努力工作賺錢。」
採訪：徐錦池、嵐山
攝影：潘冠恩、沈健程
