心不在焉調理農務的假農夫．真狼凸，對住做了頭條主角的李沙皇張相，喃喃自語：「引蛇出洞，條友咁毒，搶晒風頭。」
不斷影相更新fb的太監光開解：「呢條小丑，有權用盡，有彩攞盡，樹大招風，自曝其短，到時，還有乜把炮同你爭！」太監在沙皇名字旁以×作記號，等於踩完線，勾走呢個對手。
「西環俾好多like佢，猛話這才是去殖化的果斷措施。我驚西環也吸毒上癮咁，慢慢睇中呢條友，咁下屆我邊度有運行？」
「咁，想幾時出招收拾佢？」太監翻出沙皇大疊黑材料，厚度赫然超越貪曾貪湯。
「等他跟大學開片劈友至兩敗俱傷時，我們坐收漁人之利，棒打落水狗。」
「我已聯絡好李波日報，瘋傳WhatsApp俾商界老友呢招，我熟晒手。」
「姓李呢條友唔知水浸眼眉，佢身邊全是我嘅人，隨時插佢，等住收屍吧。噢，問點解咁憎佢？條友好命，自封為皇，以為同我有得爭！見過沙皇變沙翁未？真係見過！我當佢沙翁咁，一口氣連吞七個！」