每逢年頭年尾都有好多嫁娶喜慶事，內地梳化股敏華控股（1999）老闆黃敏利噚日嫁女，晚上喺灣仔會展筵開過百圍，據在場賓客所講，特首梁振英都有到賀，不過匆匆來匆匆去，7點半開席之前，佢喺大約十名西裝友陪同下離開。
敏華屬於家族企業，老闆黃敏利與太太都係公司執行董事，佢哋嘅寶貝女黃影影29歲，畢業於美國威斯康辛大學麥迪遜分校，取得市場學及社會學學士學位，2009年已經加入敏華幫手，舊年初升做執董，負責品牌與大中華區生意。聞說佢租樓畀人，租客就變咗老公，唔知嫁咗之後會否減少工作量，還是屬意做女強人，準備將來接棒呢？
呢場婚宴，除咗知道黃老闆同梁振英友好，佢同一班股評人都friend，鄧聲興、藺常念、林家亨、彭偉新都有到，主人家認真交遊廣闊。